जुन्या निष्ठावंत कार्यकर्त्यांना न्याय देण्याची मागणी; पक्षांतर्गत नाराजी उफाळली.
(वरील फोटो संग्रहित)
सर्जेराव देशमुख : डीपी रोड येथे आयोजित बैठकीदरम्यान बड्या राजकीय पक्षातील जुन्या आणि निष्ठावंत कार्यकर्त्यांना योग्य न्याय मिळत नसल्याच्या नाराजीतून पक्षाच्या पदाधिकाऱ्यांनी खासदार आणि आमदार यांच्या गाडीला घेराव घातल्याची घटना समोर आली आहे. या वेळी जुन्या कार्यकर्त्यांना योग्य संधी द्यावी, त्यांचा सन्मान राखावा आणि पक्षासाठी वर्षानुवर्षे काम करणाऱ्या कार्यकर्त्यांच्या योगदानाची दखल घ्यावी, अशी मागणी करण्यात आली.
पक्षाच्या वाढीसाठी अनेक वर्षे मेहनत घेणाऱ्या जुन्या कार्यकर्त्यांना डावलले जात असल्याची भावना पदाधिकाऱ्यांमध्ये निर्माण झाली आहे. निवडणुकीच्या काळात कार्यकर्त्यांची आठवण होते; मात्र पदे, जबाबदाऱ्या आणि संधी देताना निष्ठावंत कार्यकर्त्यांना बाजूला ठेवले जाते, अशी नाराजी यावेळी व्यक्त करण्यात आल्याचे समजते.
खासदार आणि आमदार यांच्या गाडीला घेराव घालून पदाधिकाऱ्यांनी आपली नाराजी व्यक्त केल्याने पक्षातील अंतर्गत असंतोष चर्चेचा विषय ठरला आहे. जुन्या कार्यकर्त्यांना विश्वासात घेऊन त्यांच्या तक्रारींचे निराकरण करावे, तसेच पक्षात काम करणाऱ्यांना योग्य सन्मान आणि न्याय द्यावा, अशी मागणी पुढे आली आहे.
जुन्या कार्यकर्त्यांच्या नाराजीची पक्षश्रेष्ठी कितपत दखल घेतात आणि त्यांना न्याय देण्यासाठी काय निर्णय घेतला जातो, याकडे आता राजकीय वर्तुळाचे लक्ष लागले आहे.
